قبل كيف تبدا الرجال الكبار يحكو لاحظت انهم بعد نقاش متشنج يفز حكيم القعده ويقلهم ايجو للصحيح ويبدو فى حلان العركة والا الخصام على الأرض بشكل عقلاني ومقبول ويوصلو لحلول .أنا اليوم نشوف برشا اراء متشنجه الي يسب فى الحكومة والي يسب فى وزير الصحة والي يسب فى المشيشي عللي صار اليوم امام مراكز التلقيح .
ايجا نتفقوا الي صار فضيحة بكل المقاييس وتتحمل الحكومة ووزارة الصحة جزء كبير من المسؤولية فيه .
أما زاده الناس يتحملوا جزء من المسؤولية على خاطر معناش عقلية التنظيم الذاتي ويلزمنا سلطة تحد من انانيتنا وهذاكا علاه حضور السلطة كآلية تنظيم ومراقبة مزال حاضر فى اذهاننا بقوة .
توه أنا لعشية حكولي أصدقاء على بعض معارفهم كيفاه لقحو فى مركز التلقيح فى رادس ،كسروا الشباك ودخلوا لقحوا بالسيف والغريب الي يحكي فيها مفتخر بيهم .
هذوما زاده راهم منا وفينا وفمه برشا منهم .
تعرفوا بعد الي صار فى 11 سبتمبر 2001 فى أمريكا ،نهار 13 سبتمبر الرئيس جورج ولكر بوش عمل خطاب تعرف اش قال فيه ،قال للامريكان راني الليلة باش نخرج أنا ومرتو وبنتي نتعشوا فى مطعم ،تقلي علاه قال هكا : نقلك لانو فاهم بلادو الي اقتصادها مبني على الاستهلاك والناس كيف تخاف معادش تخرج تستهلك وهكاكا ضرب عصفورين بحجره وحده رسالة طمأنة لشعبو وعاود حرك موتور الاستهلاك الي هو موتور مهم للاقتصاد .
نهار 13 سبتمبر 2001 بدت مخابر البحث تخدم على روحها وبدوا يخدموا على رد فعل الامريكان وقت الاعتداءات على مركز التجارة العالمي وهنا نشطت الابحاث فى سوسيولوحيا وبسيكولوجيا التجمعات البشرية sociologie et psychologique des foules .
احنا بعد الي صار اليوم شفنا برشا سبان واقالة ،اما الكلنا ناسين ظاهرلي انو رئيس الحكومة ووزير الصحة ولي مشوا يلقحوا والي ينبروا والي يسبوا الكلهم توانسة مستوردنهمش رانا .
