انا باعتباري من منطقة داخلية علاقتي بالبحر كانت نظرية نقروا عليه فى نصوص القراءة ونشوفوه فى التلفزة أما شخصيا مشفت البحر على الطبيعة الا وأنا عمري ثلاطاش سنة وباش نحكيلكم على حادثة صارتلي عام 1983 أنا نقرا فى الاولى ثانوي الي هي السابعة اساسي توه ،المعهد متاعنا فى السرس عمل رحلة لتونس بخسمة الاف ،انا كنت من المحظوظين الي شاركوا فى الرحلة ،ركبنا فى الكار وقصدنا ربي وقريب نوصلو لتونس فى هكا الصعده متع غدير الڨلة بانلتنا لتونس وهنا بدا الصياح البحر البحر أما للاسف طلع معنا شكون مهف ونبزنا وقلنا هذيكا سبخة السيجومي ،الحاصيلو شخنا بالضحك وتواصلت الرحلة، البحر منبعد وقتلي عرفتو شوفت فيه متعة وحاجات غريبة من ضمنها الناس الي تعوم بمنڨالة ،الحقيقة لتوه مستوعبتش علاش ،زعمه على خاطر هوما مهمين بارشا والوقت عندهم ذهب ،ممكن .علاش ذكرت الحكاية متع المناڨل على خاطر فى الثمانينات طلعت موضه متع مناقل casio اليابانية مضروبه بطبيعه ومكتوب عليها من لوطى water resist وكانوا يبيعوا فيهم فى السوق ب 1500 مليم، عاده فى سوق السرس فمه بياع حاطط ف مع قبصان ماء بحذاه يغطس المنقاله فيه ويطلعها تخدم، ويا للعجب تخدم وهي الكترونيك شئ كبير، الحاصيلو سيبت دلالي على بابا الله يرحمو شرالي وحده، حبيت نختبرها راهي water resist هبطت للبسين فى السرس، اي ماتستغربوش فى الثمانينات فى السرس عنا بيسين للأسف بعد 2011 ولى خربه. مشيت للبيسبن باش نختبر المنقاله اول غطسه وانا هابط نهز فى يدي باش يشوفوها العباد، غطست وخرجت وكانت منقاله ولت ڨلته guellta متع ماء، الحاصيلو لولاد صحابي قالولي راهي water resist حطها فى الشمس توه تشيح وترجع لاباس ومن وقتها وهي تتشمس وانا نستنى
