سنة سعيدة
للآخرين الي ليهم ناسين
والي لا فكرو في قطو ولا دجاج سمين
تاعبين وقلبهم ديما حزين!
سنة سعيدة
للي ما نجمش يشري حليب لولادو
وماحصلش قد مااعمل كراء دارو
طردوه من الخدمة وما عرفوش كارو
سنة سعيدة
للي تبكي على بدرها الي طفي
والي من غير ما يعرف في الهواء ترمى!
والي في عوض التهاني ولات تقبل في العزاء!
سنة سعيدة
لأم محمود الي في سيارتو الجديدة يقود
وقعد ثلاثة ايام في حفرة كبيرة مأوود!
والناس حائرة والبوليس قال: مفقود!
سنة سعيدة
للأمهات الي كبيدتهم تشوات
وماتو زهراتهم في الرقرات
بنات صغار و ياسر شابات!
سنة سعيدة
للفلاحات الي في الكماين متشعبطات
يخدمو في النهار عشرة ساعات
باش يخلصو تسع دينارات
وكل يوم معرضين أرواحهم لعدة افات :
حوادث مختلفة اخطرها متاع الطرقات!
سنة سعيدة
للي تقوم في الفجر:تكنس وتطيب
ومع الستة متاع الصباح تخرج تهيب!
تستنى النقل الريفي الميترو والا الكار
لازمها تخدم وتجري باش تكون دار!
سنة سعيدة
للطالب الي من الفلس هارب
يحضر بكل جدية في امتحاناتو
وناسي رأس العام واحتفالاتو
اما يخمم ديمافي امو ووخياتو
الي ساعات بلا عشاء يباتو!
سنة سعيدة
للأمهات المعرسين اما عايشين كالعازبات
الي على أولادهم عاملين برشا تضحيات
يخدمو ليل ونهار باش يوفرولهم ما تيسر من الحاجيات
سنة سعيدة
للشاب القارئ الي يقوم من الفجاري
يخدم المرمة وحد بمستواه لا هو داري!
ولخرى الي من الخصاصة والهم ولات سارحة غنم!
سنة سعيدة
للبعيد والبعيدة الي خلاو بلاد”الثورة المجيدة”
وشقو برور وبحورو مستقرين في بلدان عديدة
يلوجو على تحقيق أحلامهم الوحيدة:
يخدمو بكد باش مايتخصو لحد!
يضمنو مستقبلهم ويعاونولبلد!
سنة سعيدة
للي في الحبس ارماووه
وغادي شهور انساووه
ماهماش حابين يحاكموه
والاخر الي رفضو يسيبوه
سنة سعيدة
للي فقد عزيز عليه
دفنوه من غادي لغادي
خافين قبل الأحياء يذي
وخلى اولادو واحبابوبغصتهم
لا نجمو يودعوه
ولا للجامع ياخذوه
سنة سعيدة
للام الي الإرهاب بكاها الدم
وأرماها ،هي الي ماتعرفش تعوم ،في بحار الهم
وحياتها الهادئة ولات حسرة والم
تتنهد وتتساءل ومانجمتش تفهم!
سنة سعيدة
للأطفال الي سرقولهم فرحتهم
و بكل وحشية رملولهم اميمتهم
والموت البشع نساهم في لعبتهم
سنة سعيدة
للمرضى الي الفيروس حرمهم من اللمة
وحياتهم البسيطةرجعها جحيم وغمة
وكأنه يقول:الخوف والوجيعة هاكا اش ثما!
سنة سعيدة
للاالبية الي غلطوها في الثنية
ويحاولو يبعدو علاها أصحاب الضمائر الحية
من وطنيين ريفيين وبلدية
سنة سعيدة
لكل نفس أبية وعلى تجار الدين عصية
ولوطنها العزيز و مبادئها وفية
تكره الظلم والنفاق والمحسوبية
وتعشق الصدق والعدل والحرية!
سنة سعيدة
(سوسة الواحدة صباحا يوم 2 جانفي 2021)
